周一波阿King有過關心水推介，重心意甲護級大戰史帕爾主場對森多利亞。兩軍近況曳到爆，大家都唔想輸呢場「6分波」，一定穩陣行先，而且森多老帥雲尼亞里戰術一向保守，今仗唔慌多波入，捧入球細最上算。
（myTV Gold 301、Now 638、有線654及614台周二凌晨3時45分直播）
史帕爾依家排19位，森多更係包尾大幡，今仗名副其實係榜尾大戰，雙方同樣近7仗聯賽僅得1勝，最大問題係唔識入波，史帕爾今季只入得7球，森多仲衰入得6粒，攻力咁疲弱點搶分呀？森多上季靠加利亞雷拉數胡，但再鋒利嘅刀都會有生銹一日，呢位36歲嘅「老妖刀」開季至今入得1粒無以為繼，之前惟有怒炒迪法蘭斯高，搵嚟老帥雲尼亞里接手，佢領軍後3仗只得2和1負，其中2仗開2球或以下；「雲爺爺」首要任務係先鞏固防守，呢場「護級6分波」大家都唔想輸，相信會係悶戰一場，細盤乃不二之選。
串斯巴達Ｗ史篤城細
至於俄超莫斯科斯巴達主場對圖拉兵工廠，斯巴達自前史浩克04教頭泰迪斯高中途上任，連盃賽在內近3場取得2勝1和，陣中瑞典名宿軒歷拿臣囝囝佐敦拿臣，更連續2仗梅開二度，腳風轉順，面對自9月尾後未贏過波嘅圖拉兵工廠，可乘勝追擊，主勝有計。
尾場係英冠史篤城主場對西布朗，「3哥」西布朗連續2仗聯賽失分，難得遇弱竟然開平手盤，似乎有景轟，包尾嘅史篤城近5仗有4場開2球或以下，守得兩嘴，轉捧入球細好過。