今晚歐霸G組格拉斯哥流浪主場迎戰波圖。「格流」主帥謝拉特教波有板有眼，令呢隻沉睡多時嘅蘇超雄獅甦醒，今季主場只曾輸過畀些路迪，對住波圖亦冇有怕，平手盤度士撐主隊！
（Now 645、有線662及602台周五凌晨4時直播）
昔日英格蘭球壇「一時瑜亮」嘅林柏特同謝拉特，教波後同樣獲得好口碑，「林伯」帶領舊東家車仔打出青春火花，謝拉特就喺蘇格蘭儲吓「經驗值」，為有朝一日重返母會「紅軍」打好基礎。
近12場歐霸主場未輸過
好多人話中場出身嘅球員更適合擔任主帥，因為佢哋要睇通全局嘅視野，瞻前顧後，有利日後成為教頭做出正確決定，作為過來人嘅度士非常認同。事實上謝拉特自上季接手「格流」後，喺有限資源下令呢間「百年老店」重上正軌，今季於聯賽同死敵些路迪平起平坐，唔講得笑。
單計歐霸，「格流」喺G組與波圖同得4分，落後年青人2分，亦只領先包尾飛燕諾1分，稍有閃失隨時出局。雖然波圖有番咁上下，但「格流」喺謝帥執教後，近12場歐霸主場獲9勝3和，今仗開平手盤咁筍，主隊值捧。