哈神孫興民爭士哥破紀錄
今晚英超尾場熱刺作客愛華頓，熱刺前鋒哈利卡尼同孫興民再有入波就破紀錄，可惜防線危機未解決，想唔失波談何容易；愛華頓排名令人失望，為求谷底反彈主場必搶攻，兩軍近年碰頭例演入球騷，2.5球嘅大盤有買趁早。
（Now 621及611周一凌晨零時30分直播）
熱刺今季成績走樣，不過哈利卡尼及孫興民等射手仲有貨交。原來「哈神」之前4次對愛華頓都梅開二度，若然今仗再省兩粒，就會成為英超史上首位連續5次對同一支球隊都「起孖」嘅球員，而「老孫」啱啱獲選為2019年南韓人最喜愛體育明星，佢依家喺外流歐洲生涯累積121個士哥，只要入多粒就可超越前輩「黑色匕首」車範根，成為喺歐洲球壇入波最多嘅南韓球員。
不過熱刺防線大不如前，除咗維頓漢及艾達韋列特受續約問題困擾外，左閘丹尼路斯今場要坐波監，真係雪上加霜。熱刺自今年1月擊敗富咸後，已跨季11場聯賽作客不勝，其中輸咗9次，今季客戰2和3負場場有失波，總入球全開3球或以上，防線弱過藥煲。
近5次交鋒共炮製24個入波
愛華頓近6場聯賽只得1勝5負同樣曳爆，上輪就以2比3反輸畀下游球隊白禮頓，令主帥馬高施華再陷被炒邊緣。好彩李察利臣喺日前英聯盃打破近期入球荒，面對熱刺豆腐防線有雞偷。兩軍近5次碰頭共炮製24個士哥，全開3球或以上，2.5球大盤好路。