盃賽拆車信心返晒嚟
今晚英超頭場般尼茅夫主場對曼聯。中游球隊嚟講，般尼茅夫絕對係攻強於守，從來唔會泊大巴，故對親強隊都冇乜好結果，素有「Big 6點心」之稱，難得紅魔鬼近幾場順番，少讓平半上盤抵博，進取啲可以投注客勝。
（Now 621及611周六晚8時30分直播）
「般茅」上季排14，但失球數字卻係第3多，如果唔係攻力有番咁上吓，隨時要護級，不過不得不佩服領隊艾迪侯域嘅勇氣，就算手執副牌唔算靚，都敢於同對手進攻，今季睇得出佢明顯加強咗防守，但針冇兩頭利，守得穩咗嘅同時亦影響咗入球率，近3場聯賽都冇進帳，呢點相信艾迪侯域都好頭痛。
般尼茅夫係「Big 6點心」
不過，艾迪侯域嘅策略好清晰，就係盡量對同級球隊搶分，對住Big 6反而冇乜壓力，呢方面可以從佢哋對Big 6球隊嘅成績反映出嚟，近28場聯賽輸咗24場，百分比高達86%，以佢哋排名嚟講算高，故曼聯今場只係少讓平半，盤口其實相當吸引。
至於曼聯大家唔可以好似以往咁，用一支強隊嘅標準去評價佢哋，但作為一支排6、7名左右嘅歐霸球隊，佢哋依家有一定實力，尤其係經過季初低迷嘅成績，球迷對佢哋嘅要求已大減，近幾仗喺冇乜壓力嘅情況下反而交到好成績，連贏3場作客賽事，而佢哋亦似乎搵到自己定位，做好穩守突擊嘅工作。
馬迪爾上陣幫到手
普巴嘅缺陣，某程度上對曼聯嚟講係好事，起碼落場嘅球員都會走多一步，以鬥志行先，拉舒福特雖然屢受批評唔係9號人選，但周中聯賽盃對車仔射入世界波，相信有助佢提升信心，而安東尼馬迪爾近期落到場亦幫到手，配合丹尼爾占士及麥湯米尼等朝氣球員，曼聯攻力肯定唔係超班，但起碼肯走肯搏先，今場一於投以信心一票。