今晚英超兩場波戲碼唔算強勁，但亦有今季異軍突起嘅「狐狸」李斯特城打頭陣，作客硬撼水晶宮。李斯特城上輪聯賽作客狂數修咸頓9比0，創造英格蘭頂級聯賽131年史上最大分差作客勝仗，亦追平咗1995年曼聯於主場大勝葉士域治9比0嘅英超最大分差贏波紀錄，適逢上月尾係前「狐狸」班主維猜不幸離世一周年，某程度上亦成為一班球員近期頻頻報捷嘅推動力。
連同上周中英聯盃淘汰伯頓闖入8強在內，李斯特城近7仗豪取6勝1負，唯一敗仗係補時輸畀榜首利物浦，絕對係雖敗不辱。不過長路總會有盡時，而且今仗對手水晶宮絕非善男信女，上仗落後兩球之下都能夠逼和「兵工廠」阿仙奴2比2，顯然韌力十足，若果單計主場成績，水晶宮開季6次自己地頭出擊，只係輸過畀「2哥」曼城，硬淨到暈，Peter認為今仗似係和氣收場。
拖肥鬥熱刺各有問題
至於尾場熱刺作客「拖肥」愛華頓，兩軍今季表現都名大於實，問題多多，「拖肥」大灑金錢但領隊馬高施華庸碌無能，仍未建立到球隊風格；熱刺亦有歐聯顧慮，嚟緊周四凌晨要作客貝爾格萊德紅星，英超賽會今輪竟然編排佢哋打尾場，真係「人衰行路打倒褪」，隨時又以和為貴，不妨整條和波過關2串3，中1關都唔使蝕錢，但其他冇乜心水，無謂犯本，留番嚟投注周中歐聯好過。