華Dee當弗張牙舞爪
今晚英超兩支「異軍」正面交鋒，水晶宮將於主場迎戰「狐狸」李斯特城。「李城」上輪聯賽9比0血洗修咸頓令球迷嘩然，占美華迪及占士麥迪臣等火力全開；水晶宮防守一般，不過今季主場只曾輸過畀曼城，為搶分隨時以攻代守，兩軍鬥攻格，中位數2.5球入球大係信心之選。
（Now 621周日晚10時直播）
喺領隊羅渣士帶領下，李斯特城近況可用大熟大勇嚟形容，尤其一班射手操到弗晒，上輪9比0血洗修咸頓，平咗英超史上最大勝仗等多項紀錄，其中曾帶領「狐狸」喺2015至16年球季奇迹奪冠嘅老臣子「華Dee」占美華迪就，大演帽子戲法，聯賽已經累積轟入9球，喺射手榜一躍升上前列位置，明顯寶刀未老，有佢帶住占士麥迪臣同哈維班尼斯等後起之秀，兼有助攻力超強嘅左閘芝維爾頻頻後上提供側擊支援，「狐狸」進攻夠晒立體，今季10輪聯賽，當中有8場都能取得入球，等閒之輩絕對招架唔嚟。
鶴臣多計仔 或以攻代守
水晶宮上場聯賽喺落後兩球劣勢下，死咬唔放最終作客2比2逼和同城勁敵阿仙奴，韌力十足，不過該仗兩個失球都要怪後衞盯漏人，亦暴露出佢哋防線欠穩嘅問題，雖然主將韋費特沙夏無論狀態同入球數字都未及上季，但另一射手佐敦阿休喺聯賽入咗4粒，叫做填補到火力空缺，老帥鶴臣喺足壇打滾多年，出名足智多謀，主場或放手一搏鬥攻，尋求搶分機會。
況且作客嘅「狐狸」防線亦唔見得穩陣，近8場聯賽僅2次保持不失，7次開3球或以上，上周中英聯盃鬥甲組仔伯頓都要失波，今場中位數2.5球入球大值得留意。