另一場B組賽事，熱刺作客鬥貝爾格萊德紅星；熱刺今季作客未贏過，而且今場仲有可能冇埋兩大射手哈利卡尼及孫興民，讓唔起主場特醒嘅紅星，紅星讓球主勝捧得過。
（myTV Gold 303、Now 643、有線616及656台周四凌晨4時直播）
上屆歐聯亞軍熱刺今季表現大跌Watt，除咗英超排名跌出前10名，聯賽連盃賽踢咗8場作客只得5和3負，除咗英聯盃鬥英乙仔高車士打賽和0比0，其餘7場加埋失14球，包括首場分組賽作客奧林比亞高斯喺領先2球下被對手逼和2比2，而且熱刺今場仲有可能冇埋兩大射手哈利卡尼同孫興民。哈利卡尼上場對愛華頓因病毒感染缺陣，要經過體測先知能否趕及上陣。
孫興民則因為情緒不穩好大機會避戰，事關孫興民上場英超一次從後攔截，搞到愛華頓葡萄牙中場安祖高美斯斷腳，據報孫興民領紅牌後返回更衣室後，一直失控狂喊，到球隊離開葛迪遜公園球場，孫興民依然抬唔起頭失晒魂，望都冇望在場苦苦等候嘅南韓傳媒就離開，而且全程不發一言兼冇開電話，唔想同任何人接觸，返到倫敦即一支箭閃返屋企。熱刺見勢色不對已為佢提供心理治療，不過由於心情未平復，今晚好大機會缺陣。稍為安慰係高美斯成功接受手術，今季雖提早收咧，但日後應可100%康復重返球場。
貝爾格萊德紅星主場硬淨
貝爾格萊德紅星上場作客熱刺雖慘吞5蛋，不過佢哋上屆3場主場分組賽先後打和拿玻里及擊敗利物浦，只係最後一輪例行公事輸畀巴黎聖日耳門，主場威力唔可以睇小，依家佢哋排小組第3，只比熱刺少1分，今場贏波就可升上第2位，搶得出線主動權，主場出擊必定拚盡，受讓捧得過。