弗利克擅長振奮士氣
歐聯分組賽B組，榜首德甲拜仁慕尼黑，迎戰榜尾希超奧林比亞高斯，拜仁陣前易帥，助教漢斯弗利克接任臨時教練，預期有助提升眾將鬥志，雖然球隊3日後有國家打吡大戰多蒙特任務，但的確急需一場漂亮勝仗振奮士氣，只係防線欠穩嘅隱憂難以速決，遇上防線曳爆，但擅打反擊嘅奧林比亞高斯，黑柴推介中位數3.5/4球大盤。
（Now 644、有線662及602台周四凌晨1時55分直播）
拜仁上周末德甲作客以1比5慘敗於法蘭克福腳下，令高層決心即時換帥，事實上尼高高華確實抵炒，佢固然令部分功勳主將因為上陣時間不足而不滿，本身執教嘅戰術同調動能力亦一再受到質疑，對法蘭克福之役，中堅謝路美保定開波冇耐已被逐離場，但尼高高華喺拜仁受壓下完全冇作出相應調動，直至輸到1比4至換入查維馬天尼斯止血，睇到高層同球迷擰晒頭。
安慰馬天尼斯牽動人心
暫代主帥弗利克曾任德國國家隊助教8年，亦係2014世盃奪標功臣，最重要係球員生涯曾經為拜仁上陣過超過100場比賽，絕對合乎高層心目中嘅自己人條件，而弗利克今季最予人印象深刻嘅舉動，就係上月初聯賽不敵賀芬咸，喺看台安慰因為輸波同冇得落場而痛哭嘅查維馬天尼斯，呢一幕牽動無數拜仁球迷嘅心，佢擅長同球員溝通，臨危受命有助提升士氣。
奧林比亞高斯場場入波
拜仁前線雖有羅拔利雲度夫斯基繼續着火，一眾攻擊球員質素亦高，但球隊已連續8場正式賽事失波，一條軟弱嘅中場無法阻截對手反擊，今晚恐怕都難保清白之身；奧林比亞高斯喺B組3戰共失8球防線曳爆，但前線反擊卻場場入到波，上輪歐聯主場不敵拜仁但入到兩粒，今晚作客安聯球場已經冇晒壓力，想保持出線希望亦只能焗攻，料會同拜仁再演入球騷。