鳳凰遠征腳仔軟
澳職今日續演兩場比賽，頭場有墨爾本城主場鬥威靈頓鳳凰；墨爾本城今場雖有射手占美麥卡倫因傷缺陣，不過對手鳳凰一向不擅作客，而且今季開咧3戰全敗狀態極差，墨城讓半一，上盤依然值博。
（myTV Gold 302、Now 639、有線615及655台周日下午1時直播）
墨爾本城早前喺澳足盃決賽以0比4大敗喺阿德萊德聯腳下，不過對球員信心冇太大影響，上周末喺墨爾本打吡以2比1作客擊敗西部聯，開季3場聯賽保持不敗，射手占美麥卡倫受傷今場肯定缺陣，好彩新加盟嘅英格蘭前鋒格力洛尼喺季前澳足盃都有上佳演出，足以彌補墨城前線攻擊力損失。鳳凰位於新西蘭，長途跋涉作客好蝕底，睇番雙方近6次交鋒都由主場一方勝出，足證主場因素對勝負好大影響，鳳凰今季3場聯賽全部輸晒，兼且3場都係早喺半場就落後，今場捧上盤之餘，半場主勝都值得一試。
近4鬥光輝 水手全敗
至於尾場由上季常規賽盟主珀斯光輝迎戰中岸水手。光輝上場作客2比1擊敗威靈頓鳳凰，終於打開今季聯賽勝利之門，今場迎戰近4季常規賽有3次包尾嘅水手定必乘勝追擊。水手今季由前看守教練史坦積斯坐正，不過整體成績未見太大改善，聯賽連盃賽近3戰僅得1和2負，連續3場有失波，而且水手近4次鬥光輝皆輸波而回，當中3次輸2球或以上，光輝有力淨勝2粒開讓球主勝。（myTV Gold 302、Now 639、有線615及655台周日下午3時直播）