周六凌晨多場法國波上演，阿King我又有過關心水推介，其中法甲迪安將會主場挑戰巴黎聖日耳門（PSG）。PSG豪華級攻擊線近期無堅不摧，呢場對住實力欠奉嘅聯賽包尾大幡迪安，PSG一班前鋒又有機會騷哥利，入球大值博。
（MyTV Gold 302、Now 639、有線615及655台周六凌晨3時45分直播）
PSG今場有巴西球星尼馬繼續因傷倦勤，不過對球隊進攻似乎冇構成太大影響，皆因迪馬利亞狀態大勇，配合早前傷愈復出嘅主力前鋒基利安麥巴比，足以摧毀法甲任何一條防線。更何況新加盟嘅阿根廷射手莫路伊卡迪近6仗都有波入，包括連續2場梅開二度，已經成功融入球隊，對家迪安周中啱啱踢完法聯盃賽事，體能肯定輸蝕，面對來勢洶洶嘅PSG，隨時失多幾粒，入球大係不二之選。
串卡昂半和特魯瓦W
至於法乙有卡昂主場同奧連斯上演下游大戰，奧連斯作客開局踢得相當謹慎，今季6次聯賽作客5次半場同對手打和，橫掂近5仗主場入得1球嘅卡昂進攻都唔算多計，一於再追半場和。（周六凌晨３時開賽）另一場法乙，前列分子特魯瓦主場鬥華倫西恩斯，華倫西恩斯近4仗聯賽都入唔到波，搶分能力欠奉，相反特魯瓦上輪聯賽擊敗「1哥」羅連安特士氣大振，呢場有力乘勝追擊，主勝好路。
（周六凌晨３時開賽）