歐聯今周嚟到第4輪賽事，好多球隊已掌握出線主動權，其中1支係C組嘅英超勁旅曼城，佢哋今晚作客再鬥阿特蘭大，只要贏波即鎖定出線資格，戰意唔使懷疑，贏波機會高唱入雲。
（有線662及602台周四凌晨4時直播）
自2008年阿聯酋富豪文梳亞入主後，曼城有大水喉射住之下不斷壯大，從只識不斷贏波嘅暴發戶，經名帥哥迪奧拿雕琢後，升呢至踢法優雅嘅豪門，哥帥領軍「藍月亮」嘅125場賽事中，豪取95勝16和僅14負，狂轟315球，上季橫掃國內4項錦標，在英格蘭球壇嘅統治力拍得住昔日嘅曼聯。不過曼城喺歐聯嘅最佳成績只係4強，而且於哥帥麾下更連續3屆連4強都不入，作為豪門實在唔合格，因此今屆會集中火力攻歐聯，難怪季初聯賽表現略有起伏。
阿特蘭大要交學費
雖然阿特蘭大係意甲前列分子，但喺歐聯只屬初哥，主帥加斯柏連尼更係「進攻狂徒」，2011年季初畀國米炒魷、最落難嘅時刻，獲當時執教巴塞嘅哥帥邀請觀操，不過要踢到像曼城般行雲流水嘅進攻，絕不容易，2周前佢哋造訪「藍月亮」反輸1比5，有辦你睇，何況近5仗贏得1場咁大把，狀態麻麻，堅持鬥攻猶如自殺，相信曼城今仗可贏波提早晉級。