前鋒啞火以守代攻
周六凌晨西甲重頭戲，西維爾主場同馬德里體育會高手過招。踢法穩守至上嘅馬體會，近期有進攻主力祖奧菲歷斯因傷倦勤，前場進攻乏力嘅問題愈趨嚴重，面對防守表現大有改進嘅西維爾，馬體會一班前鋒發揮空間有限，兩軍開局隨時陷入膠着，半場和值得捧場。
（Now 632周日凌晨1時30分直播）
鐵血防守向來都係馬體會嘅看家本領，今季喺主帥施蒙尼調教下，「床單軍團」嘅後防即使經歷巨大人腳變動，整體穩健表現依然不變，聯賽至今僅失過6球，成功將「西甲最佳防守」嘅金漆招牌省到靚一靚。不過施蒙尼近年亦積極求變，致力幫助球隊改善進攻效率，今季仲落重本引入極具創造力嘅祖奧菲歷斯，可惜呢位葡萄牙小將近期受傷要抖一排，冇咗佢喺中場突破同派牌，等於斷晒艾華路莫拉達同迪亞高哥斯達兩大射手嘅米路。而且馬體會今季開局經常同對手踢「悶波」，近6場作客有5次半場同對手打和，比賽早段慢熱嘅情況相信會持續。
西維爾踢法留前鬥後
西維爾今季防守表現亦有明顯改進，近2仗主場全勝之餘，亦成功保住清白身。可惜同馬體會一樣，西維爾陣中同樣缺少一位高產射手搶士哥，新加盟嘅兩位前鋒盧克迪莊同查維亞靴南迪斯，今季各自喺聯賽都只係入到1球，效率實在麻麻。更何況西維爾今季5次主場出擊，上半場都同對手鬥到難分難解，踢法留前鬥後，今場同強敵馬體會對撼，料兩隊開局都難佔明顯優勢，半場和要得過。