攻力強橫主場盡砌
周五澳職獨腳戲，FC悉尼主場迎戰紐卡素噴射機。FC悉尼上周雖被西悉尼流浪者打破今季聯賽不敗身，不過整體表現唔算曳，而且佢哋近年主場專剋噴射機，有力打場翻身仗，主隊讓半一波童捧上盤。
（myTV Gold 302、Now 639、有線615及655台周五下午4時30分直播）
FC悉尼上周喺打吡戰作客西悉尼流浪者輸0比1，開季2連勝走勢告終，但值得留意FC悉尼喺該場比賽控球比率接近7成，射門次數更錄得壓倒性優勢嘅14比2，睇落表現冇太大走樣，若非前鋒巴巴路西斯嘅頭槌攻門欠運中柱，以及西悉尼守將奇洛巴古斯禁區內疑似手球，但球證睇唔到冇吹罰12碼，FC悉尼應未致於會全失3分，相信只要FC悉尼踢番出應有水準，配合喺主場一定搏命嘅決心，絕對有本錢重敲勝鼓。
作客悉尼噴射機未威過
上季常規賽排第7、無緣季後賽嘅噴射機低處未算低，今季放走前線主力奧當路雲後，開季2場聯賽僅得1分，聯賽首仗面對近4季常規賽有3次包尾嘅弱旅中岸水手，最終噴機機都要幾經艱辛先搶番1分，整體表現令人失望，依家球員信心同狀態都有所不足，作客出擊更加不容樂觀，畢竟噴射機近年作客FC悉尼都係輸多贏少，對上6次造訪悉尼只得1和5負未贏過，今仗主隊FC悉尼讓半一唔算多，上盤捧得過。