今晚意甲快車獨腳戲，褪色勁旅AC米蘭主場硬撼史帕爾。AC今季立立亂，新帥皮奧利雖然未執掂隊波，但急於開齋一定主動搶攻，作客嘅史帕爾亦要搶分護級，今場捧入球大更上算。
（myTV Gold 301、Now 638、有線654及614台周五凌晨4時直播）
貴為傳統勁旅，AC近年戰績令人失望，今季為重建仲特登放棄打歐霸盃，想專心打好聯賽，點知開季表現未如理想，頭7仗聯賽贏得3場，如今跌到落聯賽中下游，搞到今夏先執教嘅教頭甘柏路即時被炒，依家要搵「救火專家」皮奧利幫拖。但皮帥似乎仍未諗到計點執，首仗兩度領先下都畀萊切逼和2比2，上仗作客更加以1比2輸畀羅馬，睇得出佢打法偏重進攻。依家AC攻擊更為流暢，可惜未能做到攻守平衡，變得入得又失得，由於領軍兩仗都未嘗一勝，為求開齋，今次主場遇弱一定搶攻。
近3次交鋒轟12球
排聯賽尾2嘅史帕爾當然唔係好貨色，單計作客已4連敗，但查實佢哋只係落後AC米蘭3分，如果今仗贏波，隨時可以拖埋AC落水，預計今場為搶分護級唔會縮。翻查紀錄，兩軍近3次交手，合共炮製12個士哥，打得非常開放，加上AC近5仗全開3球或以上，鬥攻格局捧大盤冇衰。