周二凌晨瑞典超連場大戰，阿King有過關心水同大家分享。重心「3哥」馬模將於主場同「4哥」ＡＩＫ蘇納上演前列大戰，馬模不嬲靠穩健防守揾食，唔會輕易失波，面對勁敵ＡＩＫ蘇納更加唔會冒進，中位數2.5球入球細好路。
（周二凌晨2時開賽．馬會網上文字直播）
瑞典超球季嚟到尾聲，冠軍爭奪戰進入白熱化階段，前列佐加頓斯、哈馬比、馬模同ＡＩＫ蘇納四大巨頭積分接近，任何一隊稍有差池，就好大機會要同歐戰席位或冠軍講拜拜。馬模暫以得失球差力壓同積59分嘅ＡＩＫ蘇納排第3，喺追趕榜首球隊嘅同時，馬模亦要力保前三位置取得歐戰入場券。好在馬模最煞食就係穩健防守，打到季尾喺聯賽只係失過16球，係聯賽失波數最少球隊，加上兩軍近7次交手全開2球或以下，呢場中位數2.5球入球細值得再追。
佐加頓斯大開殺戒
同時間開波有佐加頓斯主場迎戰奧雷布洛，奧軍近4場作客場場有失波，後防甩漏嚴重，呢場面對爭冠分子佐加頓斯，恐怕難逃一劫，入球大值得留意。
最後串場葡超，布拉加主場鬥辛達卡拉，火力强勁嘅布拉加强勢回勇，近期盃賽4連勝轟入10球，有本錢大炒近4仗作客3敗嘅辛達卡拉，讓球主勝值博。