今晚英超「倫敦打吡」阿仙奴主場迎戰水晶宮。「兵工廠」上場聯賽3分盡失，好彩射手拿卡錫迪可望擔正上陣，同好拍檔奧巴美揚合作攻堅，加埋剛喺歐霸起孖嘅尼高拉斯比比，火力全開。而且阿仙奴同水晶宮近年碰頭演慣入球騷，一於吼實中位數3.5球入球大。
（Now 622周一凌晨零時30分直播）
阿仙奴今季表現主強客弱，近4場聯賽作客未贏過，包括上場0比1不敵升班球隊錫菲聯。痛失3分之餘，領隊艾美利都備受抨擊，為力爭前4歐聯席位，「兵工廠」返主場必望打翻身戰。事實上阿仙奴喺酋長球場發揮可靠，單計聯賽今季4次主場獲3勝1和佳績。今季重磅收購尼高拉斯比比上仗歐霸踢出身價，尾段兩個靚罰球帶領球隊反勝甘馬雷斯，信心返晒嚟，配合埋前線雙箭奧巴美揚及拿卡錫迪，只要搵到默契，呢個「阿仙奴版三叉戟」火力唔講得笑。
近4次交鋒至少有4粒
作客嘅水晶宮喺老帥鶴臣帶領下，今季令人眼前一亮，現時只落後今場對手阿仙奴1分，其中進攻核心韋費特沙夏今夏轉會唔成，表現雖有所回落，好在仲有佐敦阿休同安祖斯唐辛等人分擔火力，況且水晶宮近年對親阿仙奴都戰意十足，經常鬥攻，近4次交手就全開4球或以上，今仗中位數3.5球嘅大盤有2.3倍夠和味。