今晚祖雲達斯快車賽程於主場出擊，迎戰熱拿亞。兩軍睇落實力懸殊，但祖記喺聯賽踢法慢熱；熱拿亞主打逼搶，隨時偷雞頂到半場，不妨冷敲半場和。
（myTV Gold 301、Now 638、有線654及614台周四凌晨4時直播）
祖記已連續8季稱霸意甲，加上近年不斷簽入C朗等球星，實力上喺國內超晒班，開季8場聯賽獲7勝2和，今季雖有國際米蘭稍作威脅，但其他球隊似乎仍未搵到對付「老婦人」嘅方法。因此祖記近幾季焦點都放喺歐聯度，所以好多時踢聯賽都稍為放慢腳步，或半力出擊，例如C朗上場對萊切就休息唔使踢，今場先至復出。
熱拿亞怪陣頂得兩嘴
此外祖記今季由新帥沙利掌舵後，眾將明顯未適應佢嘅傳控打法，經常空有控球優勢，入肉埋門唔多，呢個情況喺比賽初段尤其明顯，近7場聯賽有6次開半場和，其中2次更係先失波之下追和，最終下半場發力至贏波，表現唔算標青。
熱拿亞今季開局勁曳，經過近6場聯賽不勝淪為護級分子後，主帥安祖亞蘇利落鑊，球會委任聖日耳門U19教練莫達頂替，啱啱喺新帥效應下即以3比1擊敗布雷西亞，總算開到齋。雖然呢位前熱拿亞名將執教經驗尚淺，但佢早前自創2-7-2陣式，強調全體逼搶，特別初段有氣有力下，要鞏固防守唔難，造訪慢熱嘅祖記，半場和值得再追。