今晚西甲頭場好戲碼，華倫西亞主場迎戰西維爾。華倫自新帥施拿迪斯上任後，未能帶領球隊走出困局，今場仲有主力前鋒洛迪高摩連奴要坐波監，更難攻破發揮穩健嘅西維爾後防，雙方隨時陷入膠着，中位數2.5球入球細值博。
（Now 632周四凌晨2時直播）
洛迪高摩連奴停賽蝙蝠削火力
季初經歷動盪嘅華倫，自新帥施拿迪斯執教之後，表現依然飄忽不定，繼早前1比1賽和馬德里體育會後，上仗聯賽竟然以1比3不敵升班球隊奧沙辛拿，更有主力前鋒洛迪高摩連奴攞紅牌被逐，今晚要做觀眾。冇咗呢位前場核心壓陣，另一射手麥斯高美斯恐怕孤掌難鳴，「蝙蝠軍團」進攻火力勢將削弱，面對實力相當嘅西維爾，為免搶攻出事，華倫或選擇縮後嚟踢。
另邊廂，西維爾今季喺前西班牙國家隊領隊洛佩特吉帶領下，後防表現明顯有改善，近3仗全勝之餘，仲成功保住清白身，其中今季新加盟嘅前曼城防中費蘭度法蘭斯高表現出色，為防線提供充裕保護，聯賽至今全勤深得洛帥信任。翻查兩軍近5次交手往績，有4次開2球或以下，中位數2.5球嘅細盤值得再追。