熱刺作客病未醫好
歐洲冬令時間開始，大家又要捱眼瞓等多一粒鐘開波，不過今晚有場英超Big 6大戰，就算等多陣都值得。利物浦連勝紀錄上周被曼聯中斷，但之後歐聯再次清風送爽擊敗亨克，證明信心未有動搖，反觀熱刺今季演出走樣，作客病仲未醫好，樂比今場睇好主場出擊嘅利物浦，讓一球照要上盤！
（Now 621及611周一凌晨零時30分直播）
熱刺上季超額今季要「還」
樂比有個博彩界朋友成日講一句說話，就係足球同出嚟行一樣，都係預咗要「還」，所謂「還」係世事萬物皆係循環，有興自然有衰，凡事去得太盡緣分亦必早盡。呢句說話放落今季熱刺度就啱晒，佢哋上季殺入歐聯決賽，以人腳同兵源嚟計真係超額完成，所以今季季初問題陸續浮現，聯賽至今勝率只得33%，能否保住歐聯席位實屬疑問。
事實上熱刺今季最大問題來自防線，9場聯賽僅1仗冇失波，前線哈利卡尼仲叫保持到水準，但其餘主力如孫興民、迪利阿里及盧卡斯莫拉等都冇上季咁Sharp醒，加上基斯甸艾歷臣嘅離隊風波，影響咗更衣室嘅氣氛同士氣，熱刺作客已經跨季10場不勝，上場作客就慘吞護級分子白禮頓3蛋，點睇都頂唔住如日方中嘅利物浦。
利物浦傷疲盡起殺意濃
利物浦主場已經44場聯賽不敗，並且連贏11場，對上一次輸波已經係2017年4月，領隊高普最識得為球隊減壓，坦言呢類紀錄毫無意義，不過晏菲路主場氣勢強係鐵一般嘅事實，目前佢哋亦狀態良好，並冇任何主要傷兵，阿歷山大阿諾特已經病愈，安德魯羅拔臣傷勢亦無大礙，連帶阿歷士張伯倫同拿比基達都弗番晒，真正殺得性起。
睇番兩隊近3次交鋒，利物浦兩輪聯賽均贏2比1，歐聯決賽則淨勝兩球，似乎熱刺近期對住利物浦真係冇乜辦法，呢3場波半場都係得1球交收，反映兩隊上半場踢法謹慎，除上盤外不妨玩埋1.5球嘅半場細。