周四早上美職季後賽東岸一場過決賽一觸即發，衞冕之師阿特蘭大聯主場硬撼FC多倫多。阿聯前鋒祖斯夫馬天尼斯發揮可靠，有佢壓陣入波毫無難度，FC多倫多攻中普素路亦頻頻交出驚喜表現，兩軍進攻好手大晒冷，入球騷肯定走唔甩，中位數3.5球入球大冇走雞。
（myTV Gold 301、Now 638、有線614及654台周四早上8時直播）
喺英超鬱鬱不得志嘅法蘭迪保亞，去到美職執教之後隨即大翻身，帶領阿特蘭大聯殺入東岸決賽。荷蘭教頭最需要感激嘅，肯定係頭號射手祖斯夫馬天尼斯，呢位上季勇奪美職神射手嘅委內瑞拉前鋒，喺美職早已名聲大噪，此子今季入球效率未見減弱，上仗東岸4強大戰佢再有斬獲，帶領球隊2比0擊敗費城聯，入波易過借火，有佢壓陣阿特蘭大聯進攻有保證。
繼淘汰圈擊敗華盛頓聯隊之後，FC多倫多上仗東岸4強再以2比1擊敗紐約城，表現極具說服力，其中比賽中梅開二度嘅普素路絕對係搶盡風頭，成功喺前鋒艾迪杜里缺陣期間，擔起進攻大旗。回顧往績，兩軍近6次對碰，5次開4球或以上，呢場隨時又演對攻戰，中位數3.5球入球大係心水之選。