星將壓陣頑抗墨城
周日下午澳職大戰，西部聯主場出擊迎戰墨爾本城。有多位實力猛將壓陣嘅澳職新軍西部聯，開咧發揮絕對唔失禮，就算要面對老牌勁旅墨爾本城，都有本錢力守住對手攻勢，入球細值得留意。
（MyTV Gold 302台、Now 639、有線615及655台周日下午3時直播）
今季新加盟澳職嘅西部聯，繼首戰作客1比0擊敗威靈頓鳳凰後，上場面對去季常規賽盟主珀斯光輝，形勢不落下風同對手打成均勢，最終賽和1比1，開季2戰不敗，暫時同今場對手墨爾本城同得4分。西部聯陣中除咗有前意大利國腳迪亞文迪壓陣之外，上仗成功開齋嘅希臘中場彭拿基奧迪斯干尼，過往亦長期喺意甲揾食，級數絕對有保證，而且球隊連續2場主場出擊，免卻舟車勞頓，可將陣中球員年紀偏大嘅影響減到最低。
墨爾本城周中澳足盃決賽慘吞阿德萊德聯4蛋，失落冠軍之餘，激戰過後難免要回氣。而且墨爾本城聯賽首戰作客墨爾本勝利亦大踢穩陣波，最終互交白卷賽和0比0，今場料會繼續以穩行先，中位數2.5球入球細值得再追。
光輝未弗讓唔起鳳凰
較早開波仲有威靈頓鳳凰主場鬥衞冕嘅珀斯光輝。開咧慘吞2連敗嘅鳳凰，急需1場勝仗洗去頹風，新加盟嘅前諾域治前鋒加利賀柏今場隨時候命，有望加強前場攻力，對鳳凰嚟講絕對係好消息。況且光輝開咧2戰同樣未嘗一勝，明顯未入局，加上鳳凰近3次主場出擊面對光輝取2勝1和表現有保證，今場隨時有機會搶分，鳳凰主場有得受讓，梗係揀讓球主勝。
（MyTV Gold 302台、Now 639、有線615及655台周日下午1時直播）