德國盃重頭戲，多蒙特坐鎮西法倫主場，再戰德甲一哥慕遜加柏，多蒙特喺唔夠兩星期前德甲同於主場苦戰下以1比0小勝慕遜加柏，不過佢哋德甲同歐聯兩線作戰已經非常吃力，嚟到盃仔場合隨時有保留，慕遜加柏對德國盃戰意在主隊之上，今仗多蒙特讓到一球稍嫌多，黑柴寧吼慕遜加柏下盤。
（香港開電視77台、有線662及602台周四凌晨3時45分直播）
慕遜加柏近期狀態同士氣都在多蒙特之上，上次作客西法倫力戰僅敗但畀到多蒙特好大威脅，輸得有啲唔抵，跟住歐霸盃作客羅馬，踢到補時5分鐘逼和對手，然後喺德甲對攻決戰以4比2氣走法蘭克福力保榜首位置，球隊士氣正盛，雖然目前陣中累積傷兵甚多，但新帥馬高路斯仍然可以排出具戰鬥力人腳出師，再作客多蒙特絕對有一戰之力。
連場硬仗等緊多蒙特
多蒙特開季至今成績都令人失望，德甲暫時只排第5，歐聯分組賽亦位居巴塞隆拿同國際米蘭之後，球隊近期攻不銳守不穩，上周中歐聯作客國際米蘭淨吞兩蛋無還手之力，跟住魯爾區打吡悶和史浩克04全場形勢亦處下風，防線文路爾艾簡治、阿舒拉夫等表現反覆，前線新兵杜根夏薩特、祖利安白蘭特，踢法又同本身嘅馬高列奧斯、查頓辛祖、積及拿臣等太過相似，同類型球員太多，組織踢法變化唔大，唯一強力中鋒柏高艾卡沙又成日傷，搞到經常要擺無鋒陣，今仗連2號前鋒馬里奧葛斯，仲有正選門將路文貝基都分別因傷病缺陣，戰鬥力再打折扣。多蒙特嚟緊德甲對未輸過嘅禾夫斯堡，然後歐聯再戰國際米蘭，都係不容有失嘅硬仗，今晚盃仔場合好可能會有所保留。