林伯有計惡客出招
今晚英超壓軸尾場，「4哥」車路士作客般尼。車仔自少帥林柏特接手後刮起青春風暴，連一度淪為後備嘅基斯甸普列錫都打番生晒，個個搶韁爭取表現，加上「藍戰士」近年作客食硬般尼，今季客場又連場報捷，客勝值得再追。
（Now 621周日凌晨零時30分直播）
貴為車仔傳奇，林柏特今夏回巢掌舵後，憑佢喺隊中嘅極高威望，逐漸帶領隊波重上正軌。「藍戰士」受禁買令限制，反而畀到林伯放手一搏起用新人嘅機會，佢重點提拔嘅譚美阿巴謙、美臣蒙特等小將，已經成功上位，「譚仔」依家聯賽入咗8粒，同曼城箭頭阿古路並列射手榜首位添，連同近期傷愈復出嘅赫臣奧杜爾，中前場甚至出現人滿之患，搞到貴價貨翼鋒基斯甸普列錫一度冇碇企。
般尼遇強即屈
好彩，基斯甸普列錫周中喺歐聯作客阿積士，交出靚助攻畀巴舒亞伊奠勝，唔覺唔覺佢今季已累積5次助攻，暫時係隊中嘅助攻王，可見林伯激活晒成班生牯仔。
位處中游嘅般尼，雖然近5仗取得2勝2和1負睇落唔錯，但所贏嗰兩場對手只係態沉嘅愛華頓同諾域治，面對利物浦同阿仙奴就輸晒，明顯遇強即屈。睇番車仔近年造訪般尼表現特醒，近5次聯賽作客交手取得4勝1和佳績，合共攻入12粒、僅失4球，其中4次早喺上半場就取得領先優勢，加上佢哋今季客場堅勁，唔計喺中立場打嘅歐超盃，計晒聯賽同歐聯就取得5勝1負，包括近5仗客場贏晒，表現比主場更Sharp，客勝有買趁早。