周六晚德甲焦點戰必然係史浩克04對多蒙特，黑柴跟咗德甲多年，不得不承認魯爾區打吡係最難預測嘅比賽，因睇近況同陣營消息周時都會領嘢，既然兩軍近4次對賽共產生19個入球，今場簡單捧中位數2.5球大盤。
（Now 672、FOX+、有線653及613台周六晚9時30分直播）
基於兩隊球迷勢成水火，雙方無論球會領導以至職球員，都視呢個對賽勝負為全年最重要。事實上，兩軍近年交手不乏經典，前季首循環對決（2017年11月），賽前史浩克處於佳態，多蒙特就連戰不勝，結果合演咗一場至今仲令人津津樂道嘅經典，主場嘅多蒙特上半場已經領先4球，但作客嘅史浩克竟然可以喺下半場收復失地，追成4比4開出和其他波膽；去到上季尾（今年4月）輪到史浩克處於低潮，相反多蒙特喺升勢中仲同拜仁爭緊冠軍，勢估唔到史浩克作客可以炒多蒙特4比2，呢場亦成為多蒙特上季未能奪冠嘅其中一個關鍵。
史浩克多蒙特留力今場
賽前雙方近況都唔理想，史浩克近兩場聯賽先喺主場領先下，補時遭下游科隆逼和，上輪作客壓住賀芬咸狂攻最終竟然輸0比2，賽後新帥大衞華拿竟然笑住話呢啲就係足球，踢得比較好嘅一方輸波並唔係出奇嘅事。
至於多蒙特喺歐聯作客國際米蘭嘅關鍵戰，到下半場只落後1球嘅情況竟然又懶懶閒，既唔急於搶逼，亦唔太介意喺尾段畀對手入多粒，輸完場波全隊觀感都唔係好失望。睇完呢兩場波，黑柴強烈覺得兩隊都刻意有所保留，等今晚打吡戰至大爆發，今仗要估邊隊贏真係冇把握，簡簡單單撐大盤好過。