邊緣人擔正博上位
今晚英聯盃16強爆發大戰，利物浦主場迎戰阿仙奴。「紅軍」開季勢頭強勁，喺晏菲路球場出擊更無人能擋，加上拉爾拉拿、拿比基達等「邊緣人」要趁機爭取表現，可贏客場腳軟嘅阿仙奴晉級，主勝有計。
（周四凌晨3時30分開賽）
講到今季英超最當紅球隊，非利物浦莫屬，頭10場聯賽豪取9勝1和，包括日前反勝熱刺2比1，相信除咗曼城之外，真係冇邊隊可以阻到佢哋，聯賽、歐聯冠軍無疑係最大目標，但係唔代表佢哋唔重視英聯盃！至少我覺得主帥高普會趁住英聯盃，去考察一班副選球員嘅狀態，例如拉爾拉拿、拿比基達、阿歷士張伯倫、洛夫雲等，佢哋呢排不時於聯賽同歐聯後備上陣都交到貨，今仗難得擔正，一定做番齣好戲。
阿仙奴客場軟腳蟹
雖然大家都係出副選，但阿仙奴球員質素唔及「紅軍」，而且一向唔重視英聯盃，尤其係面對英超球隊，近年曾畀熱刺、修咸頓等淘汰。何況佢哋係正宗「客場軟腳蟹」，今季各項賽事打咗6場作客，只得2勝2和2負，單計近7次造訪利物浦，僅得2和5負，真係未踢先怯。的確晏菲路球場嘅威力，非等閒之輩能頂得住，利物浦唔單止今季6場主場贏晒，跨季更係14連勝，上次未能喺晏菲路贏波，要數到今年2月中歐聯悶和拜仁0比0，阿仙奴今仗凶多吉少，熱捧「紅軍」主勝。