今晚英超壓軸好戲，必屬榜首大戰──「1哥」利物浦主場迎戰「2哥」曼城，名副其實係冠軍前哨戰。不過今仗盤口有啲奇怪，氣勢如虹嘅利物浦竟然唔使讓波，只係開平手盤實在太筍，呢類俗稱為鬼盤，有請君入甕引你買「紅軍」之嫌，不過我就一於少理，何解呢？
首先，利物浦嘅晏菲路主場威力強勁，單計今季5場主場聯賽贏晒，而且近7次喺晏菲路迎戰曼城亦豪取6勝1和，再者「藍月亮」上次造訪此地贏波，已經係2003年嘅事，要破咒絕非易事。其次係曼城中後場傷兵滿營，上季能在聯賽反超利物浦奪冠，全靠主場贏2比1之役，當時兩位中堅拿樸迪及高柏尼，一個受傷，另一個已離隊，難怪今季防線表現騰騰震，甚至門將仲要用到久疏戰陣嘅哥迪奧巴禾，但依家落後6分，焗攻隨時暴露更多破綻。
最後係「紅軍」班主約翰亨利，佢旗下除咗利物浦之外，仲有美職棒球隊波士頓紅襪。不過後者戰績欠佳，約翰亨利唔單止冇打算添兵，仲考慮減磅，另一邊廂，佢就向「紅軍」高層及主帥高普大派定心丸，稱若果需要加強陣容，或未能放甩曼城的話，可放膽於冬季轉會窗大灑金錢買人。截然不同嘅態度，反映出佢同「紅軍」球迷一樣，對從未攞過嘅英超冠軍趨之若鶩。正正係上述3大條件，令我覺得毋須理會鬼盤，全力撐主場嘅「紅軍」坐和望贏。