主場砌曼城數據贏晒
今晚英超爆發榜首大戰，利物浦主場對曼城。「紅軍」聯賽主場已超過兩年半未輸過，加上多年來晏菲路都食住「藍月亮」，今場開平手盤真係有啲筍過龍。當然曼城非善類，盤口向來惡，唔使過分擔心有「鬼」，樂比今場撐利物浦。
（Now 621周一凌晨零時30分直播）
利物浦對上一次聯賽主場輸波，已經要追溯到大前季，即2017年4月，之後兩年半保持28場不敗，而且近20場仲要贏咗19場，數據之強絕對唔係運氣使然，而係真材實料。
4超強數據撐紅軍
同埋曼城作客晏菲路嘅數據實在太差，近16次到訪未贏過，僅得5和11負劣績，高普亦可以話係哥迪奧拿嘅剋星，哥帥職業生涯輸過7次畀高普，係輸得最多次數嘅領隊，加上利物浦近年喺Big6對決嘅主場戰績輝煌，22次主場出擊只係輸過1場，擁有以上4個超強數據，今場捧利物浦可謂理所當然。
事實上，利物浦季初表現可謂極其平穩，11戰10勝1和，唯一失分係作客對曼聯，該仗「紅軍」踢法偏向保守，畢竟榜首有一定優勢，但今仗主場出擊預計高普會進取少少，況且上周中歐聯對亨克一仗，沙迪奧文尼同羅拔圖法明奴都擔任後備，擺到明留力今仗。
藍月亮有後顧之憂
另一邊廂「藍月亮」曼城今季表現較為飄忽，主場輸畀狼隊同作客不敵諾域治都令人意外，最令人擔心係巴西鋼門艾達臣摩拉斯今仗因傷缺陣，要由後備門將哥迪奧巴禾頂上，不過巴禾啱啱場歐聯後備入替卻領紅牌被逐，搞到要隊友基爾獲加客串門將，隨時影響今場把關嘅信心。