周六凌晨有場重量級熱身賽，兩大南美勁旅巴西、阿根廷於中立場沙特阿拉伯拍跳。阿根廷今次重召兩大王牌美斯及阿古路，不過兩人同一班新血未夾慣，未必可即時發揮最大作用；巴西攞完美洲國家盃後「懶懶閒」，連續4場熱身賽未贏過，考慮到兩軍近年交手通常少入波，今場捧2.5球細最好路。
（周六凌晨1時開賽）
阿根廷喺今夏美洲國家盃攞完季軍後踢咗4場熱身賽，全部冇用美斯、阿古路、迪馬利亞等舊將，反而攞到2勝2和唔錯成績，證明拿達路馬天尼斯、盧施素、里安度柏利迪斯等新世代有料到，假以時日不難成為國家隊骨幹，今次主帥史卡朗尼重召美斯、阿古路兩大王牌，正好畀個機會呢班後生仔「偷師」，吸收國際賽經驗。不過史卡朗尼對上4場熱身賽用盡方法希望擺脫「美斯倚賴症」，今次搵番美斯入伍真係唔知好事定壞事。
巴西戰意低兼冇尼馬
巴西喺今個夏天以東道主身份贏得美洲國家盃，4強正正就係擊敗今場對手阿根廷，與上次交手相比，巴西今場繼續冇養緊傷嘅尼馬，而且艾華頓索拉斯、費蘭甸奴同丹尼爾都相繼落選，反而皇馬新貴洛迪高高斯、阿士東維拉孖寶韋斯利摩拉斯及杜格拉斯雷斯、貝迪斯守將艾馬臣艾巴里斯杜都首度獲徵召，試陣意圖非常明顯；巴西對上4場熱身賽對哥倫比亞、秘魯、塞內加爾及尼日利亞呢啲「一線尾、二線頭」球隊，成績只得3和1負，友賽戰意唔算高，今場亦不宜過分睇好。
睇番雙方近6次交手，巴西攞到4勝1和1負略佔上風，不過當中有5次總入球都唔超過2球，足證兩隊已經熟晒路，勝負可能只係一球上落，今場大細中位數有2.5球，波童建議捧細。