煞科日3雄最後一博
歐國外周三凌晨煞科，其中E組威爾斯主場同匈牙利上演出線生死戰。威爾斯要爭E組最後一名出線資格，呢場非勝不可，面對關鍵大戰，相信對賽雙方踢法都會比較謹慎，比賽場面料會相當膠着，中位數2.5球入球細值得留意。
（有線601及661台周三凌晨3時45分直播）
踢晒8輪歐國外賽事嘅E組1哥克羅地亞，已經鎖定首名身份晉級決賽周，餘下席位將會由匈牙利、威爾斯同斯洛伐克爭奪，3隊鬥到最後一輪依然只差2分，形勢爭持激烈。其中落後匈牙利1分嘅威爾斯，想出線唔使諗肯定要力爭3分，雖然威爾斯近5次主場4勝1和佳績，不過全部都只係1球上落，其中4戰開2球或以下，進攻瓣數唔算多，呢場對住進攻質素都只屬一般嘅匈牙利，兩軍難有大手筆交易，吼實中位數2.5球入球細好過。
斯洛伐克速決阿塞拜疆
同組斯洛伐克主場鬥阿塞拜疆，以2分落後2哥匈牙利排名第4嘅斯洛伐克，依然保有晉級一線生機，為爭決賽周入場券，呢場除咗要確保贏波之外，當然係希望威爾斯會同匈牙利打和，到時斯洛伐克就可以較佳對賽成績，壓過匈牙利出線。對手阿塞拜疆7戰僅得1和6負，而且連續6仗半場就已經落後，包括首循環主場以1比5不敵斯洛伐克，後防不堪一擊，呢場隨時再由頭輸到落尾，半場主勝係好路。
（有線605台周三凌晨3時45分直播）