周五深夜歐國外J組焦點戰，波斯尼亞主場硬撼「1哥」意大利。意大利於頭8輪分組賽全勝，早已獲出線資格之餘，更打破國家隊喺歐洲國家盃外圍賽連勝紀錄，預計「意軍」主帥文仙尼，今場會趁機輪換試陣，特別係恩莫比尼同比洛迪嘅正選中鋒之爭仍未有定案，二人有機會落場的話，必拚盡爭取士哥。
（香港開電視77台、有線662及602台周六凌晨3時45分直播）
文仙尼球員年代威水，依家做國家隊領隊同樣叻仔，斷估之前8連勝個績咁靚，唔會貿貿然突然拆自己招牌，會繼續用番自己嗰套戰術，畀球員盡情發揮。佢哋分組賽8戰入25球，攻力有番咁上下，無論用恩莫比尼、艾沙拉維抑或比洛迪，都擔得起入波責任。
波斯尼亞攻強守弱
波斯尼亞落後次席芬蘭5分，出線機會相對渺茫，只能放手一搏等待奇迹。事實上，呢支坐擁射手迪斯高嘅東歐球隊一向攻強守弱，今屆8場歐國外共入17球，有7場開3球或以上，捧2.5球入球大最上算。