Goal手雲集以色列
周二凌晨國際熱身賽上演「南美對決」，由阿根廷同烏拉圭喺中立場以色列交鋒。雙方王牌前鋒美斯、卡雲尼及蘇亞雷斯上場回歸國家隊即有好表現，眾多入球好手壓陣，相信今場會更放開懷抱鬥攻，波童揀中位數2.5球入球大。
（周二凌晨3時15分開賽）
美斯復出即有士哥
阿根廷及烏拉圭踢完今夏美洲盃後，踢咗5場熱身賽，頭4場同樣冇徵召一班舊有主力包括美斯、阿古路、卡雲尼及蘇亞雷斯等等，直至上場先重召佢哋入伍。除咗阿古路冇份出場，其餘3人都交足功課。當中停賽刑滿復出嘅美斯，喺對巴西嘅熱身賽補中12碼一箭定江山，協助阿根廷擊敗死敵，而且呢位巴塞球王全場表現活躍，如果唔係單刀及罰球畀對方門神艾利臣比加救出，美斯應該唔只入1球。咪忘記除咗佢同阿古路，阿根廷仲有祖記射手保羅戴巴拿同國米箭頭拿達路馬天尼斯候命，佢兩位今季入球數字都唔少，可見阿根廷鋒力之強大。
至於卡雲尼就喺烏拉圭贏匈牙利2比1場波先開紀錄，拍檔蘇亞雷斯踢咗半場亦交出一次助攻，演出保持水準，效力華倫西亞嘅麥斯高美斯喺西甲更已轟入5粒，同樣值得留意。兩軍近況、狀態都半斤八両，加上近4次交手，3次分出勝負都只係一球上落，剩餘1次打成平手，往績可謂難分高下，今場名副其實屬五五波。既然兩隊鋒線目前都叫齊腳，夫添之下應會合力炮製唔少入波，捧大盤最好路。