沙基利缺陣 沙加又冇態
歐國外D組賽事，「3哥」瑞士主場迎戰格魯吉亞。瑞士翼鋒梳頓沙基利繼續因傷落選，中場核心格列沙加亦狀態低迷，進攻火力略嫌未夠穩定，瑞士目前出線形勢不俗，今場料贏波至上不求大炒，2.5球入球細可以一試。
（周六凌晨3時45分開賽）
瑞士一向缺少優質前鋒，因此非常倚重突破力強嘅快翼梳頓沙基利，可惜佢喺利物浦長居後備，近期亦因傷缺陣，大大打擊瑞士鋒力。瑞士另一進攻殺着係中場格列沙加嘅長傳，可惜沙加今季狀態低迷。
好彩瑞士整體質素始終比格魯吉亞好，加上上輪關鍵戰淨勝愛爾蘭2比0後，目前瑞士僅以1分落後榜首雙雄愛爾蘭及丹麥，由於愛、丹於尾輪正面交鋒，瑞士餘下2輪對手則只係今場嘅格魯吉亞同魚腩直布羅陀，只要全勝就肯定晉級，今場料將「目標為本」，不求大捷，最緊要唔好有重大傷病，夠人踢埋下場，而且瑞士近4場歐國外有3場開2球或以下，入球細啱數。
丹麥炸直布羅陀吼半場大
同組另一場賽事，「2哥」丹麥主場恭候弱旅直布羅陀。丹麥現與榜首愛爾蘭同得12分，但少賽1場，假如今場贏波就可升上榜首，到尾輪鬥愛爾蘭生死戰，只要保持不敗就進身決賽周，掌握出線主動權，因此今場非勝不可，預計會主動出擊、力求盡快奠勝。
另邊廂，直布羅陀一向係正宗「無骨魚腩」，連同上屆在內，近8場歐國外全敗之餘，更合共狂失29球，當中6次半場開3球或以上，今場作客求勝心切嘅丹麥，隨時開波初段即告潰敗，不過今場丹麥讓球主勝要「-4」堅過火，倒不如速戰速決，玩中位數2.5球半場大。