今晚歐國外F組煞科戰，西班牙主場鬥羅馬尼亞。穩奪小組首名出線嘅「狂牛兵團」，或會試陣畀班主力休息下，但有得上陣嘅「邊緣人」為博表現唔會Hea踢，加埋主場氣勢一開波必搶，半場主勝唔好錯過。
（香港開電視77台、有線602及662台周二凌晨3時45分直播）
西班牙小組可以話一枝獨秀，9戰豪奪7勝2和，提前鎖定首名躋身決賽周。作為曾連續兩屆歐國盃封王嘅傳統勁旅，「狂牛兵團」有咁嘅表現算係正常發揮，雖然過程中冇受到太大考驗，不過主帥羅拔摩蘭奴似乎一直未搵到最佳陣容，好彩佢哋人才濟濟，其中上仗有波入嘅前鋒謝拉特摩蘭奴，今季喺西甲高踞射手榜前列，入選國家隊延續勇態，加上老將辛迪卡索拉同堤亞高艾簡達拿等中場為爭取未來國家隊席位，肯定盡騷哥利，戰意唔使懷疑。西班牙近4仗主場有3次半場就領先，對住提早出局嘅羅馬尼亞，半場主勝值得支持。
意軍勒唔住炒得起阿美尼亞
另外喺J組同樣「線已出」嘅意大利，主場迎戰阿美尼亞。意大利全面復甦小組9戰全勝，各項賽事更做出10連勝佳績，走勢一發不可收拾，其中拖連奴射手比洛迪已逐漸坐穩正選前鋒席位，近兩仗斬獲3球弗到漏，反觀阿美尼亞出線無望，戰意成疑，頭號球星米希達利恩缺陣，實力進一步削弱，睇怕難逃大敗厄運，一於吼實讓球主勝。
（有線605台周二凌晨3時45分直播）