出線關鍵戰去到盡
周六凌晨歐國外F組焦點，羅馬尼亞將會主場同瑞典上演出線權關鍵戰。「2哥」瑞典只要取勝就可以鎖定決賽周入場券，今仗目標明確，為搶分肯定空群而出，面對仍有晉級希望嘅羅馬尼亞，兩軍隨時「大」開殺戒，中位數2.5球入球大值博。
（有線603及604台周六凌晨3時45分直播）
瑞典今屆歐國外發揮出色，至今只係作客輸過畀同組超班分子西班牙，上仗返到主場再鬥「狂牛」，瑞典眾將大踢爭氣波一度領先對手，可惜臨完場前失守，最終只獲1分，不過瑞典整體表現絕對抵讚。其中入波功臣馬古斯貝治，早期去完西亞闖蕩之後，今季重返歐洲賽場加盟俄超卡斯洛達，功力猶在，呢場有中場好手科斯貝治輸送彈藥，隨時再有機會大展拳腳。
羅馬尼亞後生仔有料到
僅落後瑞典1分屈居小組第3嘅羅馬尼亞，最後一輪要硬撼勁旅西班牙，出線形勢可以話相當嚴峻，因此呢場對住實力相對接近嘅瑞典，更加冇得手軟。
然而，羅馬尼亞近4仗歐國外主場取2勝1和1負，戰績尚算合格，但值得留意嘅係，呢4場波中有3場都有失波，反映後防欠穩，因此要搶分惟有以攻代守。好彩羅馬尼亞近年中、前場人材輩出，除咗「名將之後」伊亞尼斯赫傑外，中場阿歷山度米列達同前鋒佐治普斯卡斯雖然只係二十歲出頭，但一樣勁有質素，尤其係米列達，佢過去兩次為國家隊上陣都有波入，腳風甚順，絕對有本錢同瑞典鬥攻。再睇埋往績，瑞典今屆4次作客全開3球或以上，踢法開放，呢場有望再演對攻戰，中位數2.5球入球大係好路。