周一凌晨歐國外A組煞科戰，科索沃主場挑戰英格蘭。雖然已經確認以小組首名身份躋身決賽周，不過入波入到停唔到嘅「三獅軍團」，絕對唔會改變主攻踢法，加上有史達寧停賽後復出，英軍隨時一開波就搶攻，半場客勝值博。
（有線602及662台周一凌晨1時直播）
英格蘭上仗靠頭號射手哈利卡尼半場前連中三元，輕輕鬆鬆以7比0橫掃黑山，7戰過後取6勝1負領先2哥捷克3分，並以較佳對賽成績，提前鎖定小組第1，取得歐國盃決賽周入場券。分組賽至今狂轟33球嘅英格蘭喺A組實力超班，因此可以毫無保留大打進攻足球，大炒對手可以話係家常便飯，其中連續2戰大演帽子戲法嘅隊長哈利卡尼已經斬獲11球，腳風奇順，加上早前被內部處分嘅另一位前場主力史達寧又坐完波監，英軍火力有望進一步提升。而且「三獅軍團」今屆7戰6次半場已經領先，呢場隨時再由頭贏到落尾，半場客勝係好路。
H組阿爾巴尼亞法國追半和
至於H組已經出線嘅法國，仲要同「2哥」土耳其爭奪小組「1哥」位置，呢場作客面對阿爾巴尼亞肯定希望全取3分。可惜整體實力明顯超班嘅「高盧雞」，近期進攻效率認真麻麻，上仗面對弱旅摩爾多瓦一度落後之餘，去到比賽末段先靠基奧特射入12碼奠定勝局，最終僅勝2比1，計埋呢場，法國近3仗歐國外半場都同對手打和，呢場對住實力更強嘅阿爾巴尼亞，想打破僵局絕對唔易，半場和值得再追。
（有線603及604台周一凌晨3時45分直播）