煞科戰分途出師
今晚歐國盃外圍賽B組煞科關鍵戰，上屆盟主葡萄牙作客弱旅盧森堡。「2哥」葡軍依家只領先塞爾維亞1分，兩隊分途出擊，為爭出線「2個只能活1個」，好彩隊長C朗上仗又「戴帽」，弗到冇朋友，只差2粒就喺葡軍達到百球里程碑，今仗贏波即出線，目標鮮明，遇弱一定冇留手，讓2球亦冇有怕，直取讓球客勝。
（有線662及602台周日晚10時直播）
C朗衝百球葡軍勢炒魚腩
先講講B組形勢，榜首嘅烏克蘭已提早奪得首名晉級，因此呢組只剩番葡萄牙同塞爾維亞爭逐次名出線，現時外號「航海家」嘅葡萄牙，雖然僅領先1分，幸好今仗作客弱旅盧森堡，只要贏波就毋須理會塞爾維亞嗰邊嘅戰果，肯定晉級，所以戰意唔使懷疑。近期備受傷患困擾嘅葡軍射手C朗，上仗狂數立陶宛6比0之役連中三元，唔單止係佢職業生涯第55次「戴帽」，亦令佢喺葡萄牙累積98球，只差2球便踏入100大關，老而彌堅，造訪6連敗嘅冇骨魚腩、排尾2嘅盧森堡，呢位隊長必盡情數胡，隨時超越百球大關，帶領衞冕嘅葡軍殺入下年決賽周，就算讓2球亦照捧讓球客勝。
塞爾維亞同烏克蘭大駁火
同時間開波嘅另一場B組賽事，塞爾維亞主場迎戰烏克蘭。塞爾維亞想出線除咗自己要贏之外，同時亦要望葡萄牙失分，不過冇得諗咁多，盡地一煲必搶攻，射手阿歷山大米祖域上仗險勝盧森堡3比2又省兩粒，喺今屆歐國外已累積9球，仲有杜辛泰迪治及拿積後上支援，難怪近6仗歐國外全開3球或以上，火力全開，烏克蘭今仗有史賓安高停賽，辛真高因傷退隊，防守削弱，但既然已經出線，唔怕同你鬥攻，2.5球嘅入球大更值博。
（有線604及603台周日晚10時直播）