今晚歐國外「死亡C組」上演關鍵戰，「3哥」北愛爾蘭主場硬撼「1哥」荷蘭。北愛爾蘭今屆頭威頭勢，全因之前未遇強手，近2輪撞正傳統勁旅德國及荷蘭即跪低，今返主場再鬥客場特醒、贏波即出線嘅荷蘭，相信都冇運行，荷蘭讓一球照捧上盤。
（有線662及602周日凌晨3:45直播）
北愛爾蘭於C組頭4輪贏晒，睇落好醒，但贏嘅對手只係愛沙尼亞及白俄羅斯之流，近2場面對勁旅德國及荷蘭即全敗，尤其係上輪作客對住「橙軍」，喺75分鐘先開紀錄，點知末段連失3球倒輸1比3，明顯係欺善怕惡，出線形勢急轉直下。但喺呢個關鍵時刻，北愛領隊米高奧尼爾日前卻接受英冠史篤城嘅邀請擔任教頭，依家兼任兩軍的主帥，難免影響軍心。
荷蘭坐擁迪比、賴恩巴布、法蘭基迪莊等進攻好手，火力強勁，而喺利物浦專職防守嘅韋拿杜姆，喺領隊朗奴高文麾下，將抑壓多時嘅進攻本能全面釋放，今屆歐國外已有5球進帳，真係估佢唔到。
韋拿杜姆釋放進攻潛能
荷蘭依家德國同得15分，領先北愛3分，今場只要贏波就篤定出線，就算和波收場，若果另一邊廂德國擊敗白俄羅斯，「橙衣兵團」亦可憑較佳對賽成績力壓北愛晉級，變相令北愛今場唔贏唔得。可惜北愛遇強即屈，面對今屆歐國外3場客戰贏晒嘅荷蘭，焗攻下盞輸多兩錢重，荷蘭讓一球都冇有怕，上盤捧得過。