今日過關心水推介以國際賽做主打，阿King睇中一場熱身賽，匈牙利喺新主場迎戰南美勁旅烏拉圭；匈牙利4日後會喺歐國外生死戰作客鬥威爾斯，今場熱身試陣居多，相信唔會去盡；烏拉圭有蘇亞雷斯、卡雲尼及高甸等主力壓陣，夫添出擊信得過，客Ｗ可作為過關重心。
（周六凌晨2時開賽）
今場波安排喺布達佩斯嘅普斯卡斯球場拍跳，係該球場經過兩年重建後首場正式比賽，呢個球場亦係明年歐國盃決賽周舉行場地之一，匈牙利當然希望有機會喺呢度比賽，依家佢哋喺歐國外E組7戰得12分排第小組第2，下周三凌晨小組煞科戰會作客鬥威爾斯，勝負關係到明年決賽周入場券，為免消耗過多體力或增添無謂傷兵，今場匈牙利難免有保留，而且佢哋近5場熱身賽只得1和4負，對住世界排名比自己低嘅黑山同哈薩克都輸波；相反烏拉圭近4場熱身賽2勝2和未輸過，心態上認真得多，一眾主力蘇亞雷斯、卡雲尼、盧卡斯托拉拿及高甸今次都有歸隊，強陣出擊較可靠。
美國主場復仇加拿大
另外兩關，選咗中北美洲國家聯賽，A級A組美國主場鬥加拿大。美國上次作客加拿大輸0比2，係美國近34年來、17次對賽首次輸畀對手，乜面都冇晒，而美國想爭入4強今場非勝不可，主場出擊有力報番一箭之仇，揀讓球主勝。
（周六早上8時開賽）
另一場A級B組賽事，墨西哥作客鬥巴拿馬，墨西哥分組賽2戰全勝實力大超班，巴拿馬主場對住同組最弱嘅百慕達都輸波，今場凶多吉少，熱捧客勝。
（周六早上10時開賽）