周五凌晨比甲獨腳戲，安特衛普主場同真特上演前列大戰。「2哥」真特陣中多位攻擊手腳風極順，進攻板斧多到數唔晒，而安特衛普早前擊敗班霸布魯日士氣好，今輪主場出擊有力同真特鬥攻，中位數2.5球入球大係不二之選。（周五凌晨3時30分開賽‧馬會網上文字直播）
真特今季走勢唔錯，國際賽期前各項賽事取得3連勝，包括係歐霸盃以3比1擊敗小組勁敵禾夫斯堡，同埋上仗聯賽以2比0氣走衛冕冠軍亨克。真特致勝之道，當然係超强進攻火力，球隊聯賽至今射入30球，攻力僅次於「1哥」布魯日，中前場三叉戟迪普特列、耶梅卓克同約拿芬大衛狀態弗爆，三人都高踞聯賽射手榜前列，包辦全隊超過6成入球，可見真特進攻瓣數夠豐富，有力撕破任何防線。
馬保卡尼火併真特三叉戟
排名第6嘅安特衛普亦都唔執輸，國際賽期前大踢爭氣波，2比0擊敗「1哥」布魯日士氣大振，而且佢哋踢法相當開放，陣中剛果民主共和國射手馬保卡尼今季已斬獲11球，火力有保證；不過安特衛普近10場聯賽都有失波，後防認真靠唔住，今輪主場為娛樂球迷，肯定以攻代守，雙方射手大駁火，入球騷走唔甩，中位數2.5球入球大好路。