3戰葉士域治都先拔頭籌
周四凌晨英格蘭足總盃第1圈重賽連場激戰，阿King度條過關心水同大家分享。重心林肯城主場再鬥葉士域治，上仗兩隊打成1比1戰況膠着，今場林肯城有番主場優勢，肯定一開波就搶攻，睇好林肯城率先入波，博主隊開出1.89倍「第一隊入球」。
（周四凌晨3時45分開賽）
兩隊曾在2016/17賽季嘅英足盃賽事交手，當年仲係非職業聯賽球隊嘅林肯城，喺第3圈越級挑戰踢緊英冠嘅葉士域治，最終林肯城鬥足兩場總比數贏3比2成功晉級，其後林肯城乘勢淘汰白禮頓同般尼兩支英超球隊，歷史性闖入8強，成為一時佳話。今次林肯城想再次突圍，食粥食飯就旨意前鋒泰萊獲加，此子上仗英足盃對壘先拔頭籌，若非佢之後射失12碼，葉士域治最終能否追和1比1都成疑問。依家得到重賽機會，林肯城絕對唔會錯過；計埋上仗，林肯城近3次對葉士域治都先入球，預計今場照辦煮碗，主隊第一隊入球值得再追。
華素爾讓唔起達寧頓
另外，非職業聯賽球隊達寧頓主場迎戰英乙下游球隊華素爾，華素爾首戰錯失晉級良機，主場遭對手逼和2比2，今場作客冇本錢讓波，寧願支持達寧頓再創奇迹，讓球主勝值博。最後韋甘比主場同燦美爾上演英甲內訌，燦美爾雖然位列英甲榜下游，佢哋近4仗作客3次半場同對手打和，開局夠硬淨，上半場有力頂住英甲一哥韋甘比，半場和值得留意。