紐卡素回勇搶得就搶
今晚英超獨腳戲上演下游對決，由尾3嘅阿士東維拉主場迎戰「喜鵲」紐卡素。雖然維拉升班後表現唔曳，但依家淪落到下游掙扎，與其防守脆弱有關，不過為咗搶分護級惟有焗攻，撞正回勇嘅紐卡素，隨時合演入球騷，2.5球嘅大盤更值博。
(Now 621周二凌晨4時直播)
維拉今季重返英超後演出唔差，但畀人最深印象嘅，係佢哋不時領先之下，卻於末段崩潰反勝為敗，包括喺月頭大部分時間Lead緊，竟於最後時刻連失2粒反輸畀利物浦1比2，同班波初段搏得太盡唔識留放，搞到尾段體力不繼有關。
正副選門將都傷晒
查實佢哋攻力唔曳，有「維拉柏豪」基亞利殊助陣下，12場聯賽入咗17粒，可惜衰在戰術太保守，領先之後通常都縮晒喺後面，正所謂久守必失，難怪失咗20球、依家淪落到去下游喇，連同正副選門神湯希頓及積史迪亞都因傷倦勤，焗用第3號門將尼蘭特仲牙煙。
紐卡素捱過季初低潮後，明顯有反彈迹象，近5場聯賽取得3勝1和僅1敗，遠離降班區5分難免心雄，陣中嘅「長工兄弟」桑恩朗達夫及馬菲朗達夫堅Sharp，不過前者今仗要坐波監，對中場截擊力點都有影響。翻查紀錄，連盃賽在內，維拉近9場全開3球或以上，為搶分護級冇得龜縮，2.5球嘅入球大有買趁早。