周一凌晨英超壓軸戰，錫菲聯將會主場迎戰曼聯。聯賽新軍錫菲聯今季有超水準發揮，高強度嘅緊迫型踢法令唔少英超對手無所適從，對住戰力今非昔比嘅「紅魔」，錫菲聯主場出擊有本錢頂住對方攻勢，一於吼實中位數2.5球入球細。
（Now 621周一凌晨零時30分直播）
曼聯作客頻食白果
以往唔少英超新升班球隊為提升競爭力，都會大灑金錢引援，錫菲聯就反其道而行，繼上季以英冠王者姿態強勢升上英超之後，今季更進一步於競爭激烈嘅英超殺出一條血路。麥哥迪克同隆特史譚等唔少主力作為上季球隊奪冠功臣，雖然過往都冇任何英超征戰經驗，不過就繼續獲得重用，一班英超初哥亦冇甩拖，嚴格執行領隊韋達嘅緊迫型踢法，於英超頻頻搶分，近5場聯賽保持不敗，而且只失過2球，4次開2球或以下，表現相當硬淨。
「紅魔」今季作客發揮經常失準，開咧至今6場聯賽客戰僅取1勝2和3負，只係贏過暫列榜尾嘅諾域治，其餘5場有3次食白果，全部總入球在2球或以下，表現認真唔開胃，呢場對住防守硬淨嘅錫菲聯，「紅魔」進攻隨時再遇阻滯，捧中位數2.5球入球細划算。