決賽次回合睇定搏拳
今晚亞冠盃決賽爆發次回合，日職球隊浦和紅鑽返埼玉主場再鬥沙特勁旅希拉爾。紅鑽喺首回合全場捱打，只輸1粒已經偷笑，就算想收復失地，都要先穩住防守；希拉爾領先緊一定睇定嚟食，加上近7屆亞冠盃決賽勁旺半場和，不妨追多鋪。
（Now 670、有線651及611台周日晚6時01分直播）
紅鑽喺首回合因西川周作坐波監，把關嘅二號門將福島春樹出迎犯錯，導致以0比1落敗，想延續由日職球隊稱霸亞洲嘅勢頭（對上兩屆分別由紅鑽及鹿島封王），今仗不容有失。但觀乎首回合紅鑽全場捱打嘅表現，控球率唔夠3成，希拉爾則有多達22次射門，紅鑽得嗰兩次，冇大敗而回已經執番身彩，就算今場想反勝奪冠，但都要有自知之明，畢竟呢支日職球隊向來唔擅於強攻，連聯賽在內近3場均交白卷，既然依家只係落後1球，即使有成6萬主場觀眾吶喊打氣，都多數先鞏固防守，睇準機會再出擊。
受過教訓 希拉爾唔急
希拉爾有前意大利國腳基奧雲高、以及前法國國腳巴菲迪比高美斯坐鎮，實力唔講得笑，當中高美斯更以10粒位居亞冠盃射手榜榜首，級數絕對超晒班。不過兩年前雙方曾喺決賽碰頭，當時希拉爾首回合同樣先於主場出擊，但只能打和1比1，次回合作客焗攻下以0比1落敗，吸取上次教訓，依家希拉爾有1球在手，和波都捧盃嘅形勢下，梗係唔會亂咁攻。
再睇埋呢項賽事嘅數據，原來連同今屆決賽首回合，近7屆亞冠盃首、次回合共13場比賽，全部開半場和，可見大家都唔想喺先失波而陷於被動，初段例必穩打穩紮，留待下半場先搏殺，半場和旺到暈值得再追。