今晚除咗「寸王首騷」外，尾場曼城主場硬撼車路士同樣睇頭十足！曼城已漸被利物浦拋甩，加上防線勁多傷兵，領隊哥迪奧拿必以攻代守；「車仔」主帥林柏特用人有驚喜，成班生牯仔愈戰愈勇，3.5球嘅大盤有買趁早。
（Now 621及611周日凌晨1時30分直播）
兩名帥崇尚進攻
兩大主帥哥迪奧拿及林柏特球員時代皆係著名中場，負責掌控球隊比賽節奏，林柏特更以入波見稱，兩人從教後同樣重視進攻，哥帥推崇層層推進嘅「技術流」，「林伯」則喜歡直截了當快速打法，兩派交鋒必擦出火花。
曼城上場1比3輸畀利物浦跌落第4位，今場絕對唔衰得，但左閘辛真高近日再度受傷，門將艾達臣摩拉斯及中堅拿樸迪仍未康復，費蘭甸奴客串中堅亦多甩漏，防線問題難望改善。好在佢哋鋒力強橫，阿古路夥拍史達寧威力驚人，今場定必火力全開。
車仔喺「林伯」帶領下聯賽6連勝，依家以1分壓住曼城做「3哥」，其中譚美阿巴謙、美臣蒙特及基斯甸普列錫喺聯賽共轟19球，加上佐真奴費路刑滿復出，保證支援充足。車仔開季6場聯賽作客共入18球，有5次開4球或以上，鬥攻格局捧3.5球嘅大盤冇衰。