3度帶英超隊首騷例贏
寸王回歸，英超從此多事！熱刺喺國際賽期間辭退普捷天奴，聘用豹隱1年嘅名帥摩連奴領軍，好多球迷都非常期待，起碼就算場波唔好睇，場外花邊新聞都一定精彩先。摩連奴過往3次執教英超球會，包括兩教「車仔」及上次嘅曼聯，首騷例必贏波，樂比深信今場都唔例外，熱刺作客韋斯咸，讓半一捧上盤。
（Now 621及611周六晚8時30分直播）
普捷天奴突然落鑊，令唔少球迷意外，畢竟佢幾個月前先帶隊殺入歐聯決賽，而且連續4季企穩聯賽前4，甚至衝擊過英超冠軍，以熱刺嘅資源加上英超Big 6嘅競爭環境，可謂超額有餘。可惜熱刺今季大脫腳，令班主利維怒炒普帥，不過一切已成過去，倒不如聚焦番摩連奴能否帶領熱刺取得突破。
摩連奴最厲害嘅地方當然係捧盃嘅效率，職業生涯共攞過20次錦標，幾乎每季都無寶不落，雖則近年常被批評回塘，但佢差極喺對上兩次執教過程中，都幫「車仔」攞過聯賽冠軍及幫曼聯捧過歐霸盃，佢有名你叫「摩三季」，即係頭兩季通常都仲滿足到班主。再者摩連奴擅於激勵球員士氣，呢個特質正正係熱刺目前最需要嘅，畢竟「艾歷臣事件」令熱刺部分主力出現離心，「寸王」嘅氣場足以壓得住班球員，始終熱刺隊波係有質素，只要解決心魔，短期內反彈唔成問題。
頹爆韋斯咸防守多漏洞
主隊韋斯咸陷入低潮，已經7場不勝，佢哋今季贏過嘅3場賽事當中，其中兩仗只係屈福特及諾域治兩支榜尾球隊，睇怕領隊比歷連尼都唔捱得幾耐。「錘仔幫」目前最大問題係防守極多漏洞，後備門將羅拔圖信心不足，兩閘艾朗加斯威爾及賴恩費特歷斯經常進退失據，面對注重細節嘅摩連奴，恐怕會成重點攻擊目標，熱刺作客咁曳都要讓半一，擺明有信心。