周末德甲壓軸戲，聯賽榜二哥RB萊比錫主場迎戰尾二嘅科隆，萊比錫近期入波停不了，不過科隆啱啱換帥，新帥基斯度領軍下可望激發球員戰意同進攻欲望，今晚即使作客都有決心同萊比錫駁火，黑柴推介中位數3.5球大盤。
（Now 670、FOX+、有線651及611台周日凌晨1時30分直播）
RB萊比錫上月曾經歷低潮，但近期終於返晒嚟，3線作戰近4場正式比賽全勝共轟入20球，認真誇張，前線迪姆華拿喺呢4場波合共交出7個入球同6次助攻，奧地利翼鋒沙比薩亦連續4場都有波火，前線火力全開，為追趕榜首慕遜加柏，今晚主場必然繼續喪攻，不過佢哋防線超殘陣，除伊巴希馬天拿迪同隊長韋利柯賓一對中堅養傷外，今季表現突出嘅洛迪梅基尼上輪亦重創要養傷數周，加上德國國腳侯斯頓保上陣成疑，隨時會因攻得太急而有失。
基斯度可激活莫迪斯迪
科隆上輪踢到補時8分鐘至畀賀芬咸絕殺，計表現其實都有啲進步，但無法幫教練拜亞羅沙保住帥印，會方賽後將佢解僱，搵嚟賦閒在家嘅基斯度接手，呢位仁兄向來擅長激勵士氣，而且踢法亦主動開放，現時科隆陣中不乏具級數攻擊手，包括泰路迪、祖安哥度巴同莫迪斯迪，當中莫迪斯迪更係基斯度喺2013年執教賀芬咸時，由法甲波爾多買入嘅第1位新兵，莫迪斯迪喺2016至17年度球季，曾以25個入球成為德甲射手榜第3名，如今兩人重聚，睇吓基斯度能否激活番佢嘅射門觸覺啦！