Peter經常告訴大家，球場係英雄地，哪怕球隊表現唔錯，但差點運氣而僅敗或失分，主帥都難逃被炒厄運。英文有句說話：「What have you done for me lately?」意思係你最近為我做過乜嘢，若果近期你為我贏波或捧盃，當然冇所謂喇，之前5季普捷天奴喺有限資源下，領導熱刺穩定地重返勁旅行列，成為英超Big 6之一，證明呢位阿根廷人係有料到。
不過熱刺有位「鐵算盤」主席利維，任何涉及金錢、買賣球員等都嚴格管理，只管球場內事情嘅「肥普」係冇權過問，就算上季保住前4兼殺入歐聯決賽，可惜欠缺奪冠嘅命水，呢個係致命傷。
終極目標引富商收購
喺「生意人」利維眼中，一直都想「做靚盤數」，建新球場、用冠軍戰績等吸引富商收購，上季冇買人都有唔錯戰績，今夏增添尼當比利等新兵，竟然出閘脫腳，無可避免要換帥。利維恨捧盃就要搵個有「冠軍命」嘅主帥，適逢著名以色列經紀沙哈維「穿針引線」，協助呢支北倫敦球隊喺11小時內，極速完成炒「肥普」簽「寸王」嘅易帥行動，今晚作客韋斯咸，以摩連奴嘅功力起碼唔輸。至於榜首利物浦作客水晶宮，紅軍有沙拿同安德魯羅拔臣缺陣，唔係贏硬，尾場「Big 6大戰」曼城防線傷兵多，主場對車路士預期會係精彩對決，但不宜高估。