周五下午澳職獨腳戲，西悉尼流浪者主場迎戰墨爾本城。墨城上周雖然畀布里斯班獅吼打破聯賽不敗身，不過高產射手占美麥卡倫已經復出，進攻火力返晒嚟，遇上力爭反彈嘅流浪者，兩軍隨時合演入球騷，中位數2.5球入球大好路。（MyTV Gold 301台、Now 638、有線614及654台周五下午4時30分直播）
占美麥卡倫復出即發威
早前曾豪取聯賽4連勝嘅墨城，近期有澳洲本土射手占美麥卡倫傷愈復出，絕對係佢哋一大利好因素，此子上仗復出後即大演帽子戲法，一度為墨城搶得領先優勢，雖然球隊最終逃不過以3比4輸波嘅命運，吞下今季聯賽首敗，不過有呢個腳風奇順嘅「攻堅利器」壓陣，墨城球迷絕對唔使擔心愛隊搶分能力。即使占美麥卡倫之前缺陣嗰2場，墨城都能輕取威靈頓鳳凰同中岸水手，可見本身攻擊力有番咁上下，嚟緊進攻方面應該會愈踢愈順。
流浪者上輪聯賽以1比2不敵新軍西部聯，力求反彈嘅決心絕對唔輸墨城，而且上周末流浪者冇比賽，球員得以養精蓄銳備戰今場大戰，體能上有一定優勢，呢場主場出擊肯定踢得更進取，隨時同墨城上演對攻戰，一於吼實中位數2.5球入球大。