今晚英超「2哥」李斯特城主場迎戰榜尾屈福特。目前最接近榜首利物浦嘅「狐狸」近況弗到漏，面對啱啱炒領隊，處於群龍無首狀態嘅屈福特，贏面高唱入雲，讓1/1.5球照撐上盤。
（Now 624周四凌晨3時30分直播）
各項賽事近7仗全勝嘅李斯特城，上輪喺先落後劣勢下，下半場急起直追，最終靠占美華迪同伊恩拿祖嘅入波扭轉乾坤，2比1反勝愛華頓，開始滲出「奪冠特質」。喺領隊羅渣士帶領下，「狐狸」今季各方面都有明顯提升，表現更勝唔少傳統Big 6幾條街，難怪早前有記者問佢有冇意思轉教阿仙奴時，羅渣士一句「神回」：「呢一刻我哋隊波咁弗，點會想離隊呢？」
屈福特又換帥立立亂
近期英超領隊大執位，熱刺同阿仙奴先後易帥，屈福特領隊科里斯亦冇得留低，上任僅3個月就「落鑊」，呢次亦係「大黃蜂」今季第2次炒教頭。球隊至今僅得1勝5和8負劣績，兩任主帥固然責無旁貸，不過班波本身戰意疲弱先係問題核心，嚟緊無論邊個接手，佢哋嘅護級任務都會非常艱巨，今晚造訪如日中天嘅李斯特城，睇怕難逃被炒厄運，主隊上盤咪錯過。