首領熱刺重臨奧脫福
今晚英超快車焦點戰，必屬重拾佳態嘅熱刺作客曼聯。今場係熱刺新帥摩連奴上任後，首度重返奧脫福倒戈舊東家，誓要上演復仇記，報番上年被炒之辱。熱刺自換帥後連贏3場，「摩佬」更一改保守作風大踢性感足球，「紅魔」領隊蘇斯克查為保帥位亦要放手一搏，2.5球嘅入球大趁早買。
（Now 622周四凌晨3時30分直播）
熱刺請得摩連奴出山，一定算過度過，畢竟佢功力猶在，對英格蘭球壇亦瞭如指掌，可惜上季季中因兵變敗走曼聯，今場倒戈定必有仇報仇。查實佢以往執教車路士時，10次對「紅魔」取得5勝4和僅1敗，如果今仗贏波，佢就會繼奧尼爾及賓尼迪斯後，成為第3位帶領兩支唔同球隊作客贏曼聯嘅主帥，一定落多幾錢肉緊。
兩軍防線同樣多甩漏
熱刺自「寸王」接手後仍處於「蜜月期」，連歐聯在內3連勝入10球。不過摩連奴改善到熱刺鋒力問題，防線仲有排執，上任後3場都有失波，包括兩場聯賽均喺領先3球嘅大好形勢下，末段連失2球，最終以3比2險勝韋斯咸及般尼茅夫，上周歐聯對奧林比亞高斯，更係先落後兩球下反勝4比2，3戰全開3球或以上。
曼聯防線亦唔好得幾多，近兩場聯賽和波夾埋失5粒，有傳若然今仗及周末兩場聯賽贏唔到的話，領隊蘇斯克查好有可能被炒魷，所以一定搶攻爭勝。好彩「紅魔」鋒力仍有保證，近5戰入12球，前鋒拉舒福特漸有大將之風，單計聯賽已入7粒，必藉主場之利同對手駁火，中位數2.5球大盤穩陣。